PASAMBAHAN MINANG, ALUR ROKOK JO SIRIAH

Pasambahan (Bahasa Indonesia: Persembahan) merupakan salah satu acara adat di Minangkabau. Di dalam pasambahan ini digunakan bahasa halus berkualitas tinggi yang sarat dengan perumpamaan dan nilai-nilai budaya. Contoh pasambahan yang dikenal di Minangkabau

• Pasambahan Siriah Pinang (Persembahan Sirih Pinang)
• Pasambahan Manjapuik Marapulai (Persembahan untuk Menjemput Mempelai Pria)
• Pasambahan Kamatian (Persembahan dalam acara kematian)

Alur dalam Adat

Biasanya dipakai dalam penuturan ninik mamak dan cerdik pandai .
Isinya biasanya mengandung kiasan dan petitih adat

  "Tembak ba alamaik,cancang balandasan,kato bakiasan

   Kilek baliung lah ka kaki,kilek camin lah kamuko

   Kilek kasai masuak aia,kilek kato masuak hati”

ALUR ROKOK JO SIRIAH

Sipangka         : Datuak Bandaro

Sialek             : Datuak Sampono

Sialek        : Datuak Bandaro,…..Pasambahan tibo bakeh datuak.

Sipangka   : Sambah di Allah,manitahlah Datuak

Sialek       : Sambah nan di tibokan titah nan di antakan,nak sarapek nyolah niniak jo mamak,sifat , tarhalia di ateh rumah nangko, usah ka dibilang di atap gala, artinyo bana sambah sajo di muliakan, ka pambilang paatap gala, laikoh tampak samparono sambah tibo bakeh Datuk?.

Sipangka   : Manintahlah Datuk!

Sialek     : Sambah nan di tibokan titah nan di antakan, ma agak hari kapatang siriah ka bacabiak, pinang bagatok, dihadapan karib jo kabiah, ipa jo bisan, korong jo kampuang, sekarang alah bahadiri. Baapo dihari nan sahari nangko, janjang batingkek bandua batapuak, duduak sahamparan tagak saedaran, manimbang sapanjang adat mangaji sapanjang alua, alah ciek jo duo, duo jo tigo, alah banamo basalasai,
               Picak nan satapiak bulek nan sagiliang adat nan sapakai, karib jo kabieh alah batamu, anak jo bapak alah basuo, duduak bahadapan tagak batantangan maisok santo jo daun, duduak nak baiyo tagak nak ba muah, sakian sambah di antakan ka bakeh Datuak

Sipangka: Sampai datuak Sampono..?

Maagak-i rundingan Datuak nan katangah, sunat kato dek ba ulang pasa jalan dek batampuah, buah panitahan datuak nan ka ambo ulang. 

Sambah manyambah di pulang kapado Allah, kato sajo dipakatokan. Apolah nan manjadi buah kato Datuak cako, maagak dihari nan dahulu, siriah nan sacabiak pinang nan bagatok, dihadapan karib jo kabiah, ipar jo bisan, korong jo kampuang nak mahadiri pakarajaan nangko.

Baapo dihari nan sahari nangko, janjang batingkek bandua batapuak, duduak sahamparan tagak saedaran, manimbang sapanjang adat mangaji sapanjang alua, alah ciek jo duo, duo jo tigo, alah banamo basalasai.

Tumbuah nan bak banyiah tabik nan bak padi, tabik di siriah nan bacabiak dipinang nan bagatok, karib jo kabiah alah batamu anak jo bapak alah basuo, duduak bahadapan tagak saedaran, maisok santo jo daun, duduak nak baiyo tagak nak ba muah, kan baitu bana buah panitahan Datuak.?..

Baca Juga : Pasambahan Minang, Alur Adat Katangah
                    Pasambahan Minang ; Alur Makan Jo Minum

 

Sialek     : Iyo Bana..

Sipangka: Yo ma nyo Datuak Sampono,..sapanjang buah panitahan Datuak nan ka tangah, lamak bak raso santan manih bak raso tangguli, tapi sungguahpun baitu, elok kato dek mufakat lamak kato dipakatokan, ambo bao kato jo mufakat, saba Datuak jo panitahan, lai koh dalam adat nan bapakai, dalam cupak nan baisi nan baitu, datuk?

Sialek     : Sampai.... Datuak Bandaro.?

sapanjang buah panitahan Datuak nan ka tangah,kok di danga lah babunyi dipandang lah barupo, ka ateh samo ba pucuak ka bawah samo saurek, limbak nan daripado itu, duduak nan samo sahamparan, tagak nan samo saedaran, ambo bao kato jo mufakat, kan baitu bana buah panitahan Datuak ..?

Sipangka : Iyo Bana..

Sialek    : Tibonyolah dalam adat nan bapakai dalam cupak nan baisi, kato di bao jo mufakat Datuak…

Sipangka: Kok baitu saba mananti ,Datuak..

Sialek     : sakiro-kiro…..

(Sipangka (Datuak Bandaro) mencari mufakat  dengan ninik mamak, alim ulama, cerdik pandai dan orang yang patut-patut yang hadir dalam pertemuan itu, Setelah di temui kata sepakat maka rundingan di kembalikan ke pada Si Alek)


Sipangka: maa.. Datuak Sampono, dihari nan cako Datuak saba jo panitahan ambo mambao kato jo mufakat jo nan duduak sahamparan tagak saedaran, picak nan satapik  bulek nan sagiliang adat nan sapakai. Sabuah kato lah dipakatokan, labiah bak maisok santo jo daun, itulah bana nan ambo antakan bakeh Datuak…

Sialek     : Sampai Datuak Bandaro.?...

dihari nan cako ambo saba jo panitahan, Datuak marenjeang kato jo mufakat jo nan duduak sahamparan tagak saedaran, picak nan satapiak bulek nan sagiliang adat nan sapakai, sabuah kato lah dipakatokan, labiah bak maisok santo jo daun, kan baitu bana buah panitahan Datuak…

Sipangka:Ka ateh alah samo sapucuak ka bawah lah samo saurek, nan kito baapo nyo lai Datuak….

Sialek     :Nan Kito elok babateh,..

Sipangka: iyoo..Ma nyo datuak Sampono,…

Dahulu kato basitinah, kamudian kato basicapek, iyo capek tibonyo bakeh datuak, Maagak-i rundiangan kito cako, alah ciek jo duo, duo jo tigo, alah banamo salasai. Sungguahpun bak raso basalasai, Tumbuah nan bak baniah tabik nan bak padi, siriah naiak carano katangoh, siriah kami nak mintak Datuk kunyah, itu bana nan di antakan ka hadapan datuak,…

Sialek     :Sampai datuak Bandaro…?

Sunat kato dek baulang, pasa jalan dek batampuah, buah panitahan datuak ka ambo ulang. 

Apo nan jadi buah panitahan Datuak, kok didanga lah babunyi dipandang lah barupo, lamak bak raso santan manih bak raso tangguli, nan tumbuah nan bak baniah tabik nan bak padi, siriah naik carano ka tangah, sirian nan mintak di kunyah, khan baitu bana jinih buah panitahan Datuak tadi…

Sipangka: iyoo bana…

Sialek     :Yo ma datuak Bandaro….

sapanjang Rundiangan Datuak nan ka tangah, bulek lah buliah digolekan picak lah buliah dilayangkan, tapi sungguahpun baitu…lamak siriah lega carano,lamak kato lega bunyi, lamak lauak dek pamasak, elok kato jo maufakat, saba Datuak jo panitahan, lai koh dalam adat lamo pusako usang nan baitu, Datuak…

Sipangka: Kok itu yolah bana…

Datuak Sampono (Si alek) membawa kata rundiang mencari mufakat.Bagaimana cara mencari mufakat dapat di lihat pada”alur kato mufakat”

Sialek     :Yo ma datuak Bandaro….

Dihari nan cako Datuak saba jo panitahan, hambo mambao kato jo mufakat jo nan duduak sahamparan tagak saedaran, sapanjang parmintaan Datuak nan ka tangah, pintak buliah kandak balaku, sabuah kato lah dipakatokan, labiah bak mangunyah siriah jopinang, itulah bana nan di antakan ka bakeh Datuak…

Sipangka: Sampai Datuak…

Kok hilia lah sarangkuah dayuang mudiak lah satimbang galah, nan kito baapo lainyo Datuak…

Sialek     :Nan kito rancak babateh….

(Sumber :Sumarak Nagari,Alur Pasambahan dan Pidato Adat Minangkabau)